பூவாய் மலரும் நாள்!
-------------------------------
பூவாய் மலருமொரு நாள்
பூமியில் இந்த நாள்
பூவாசனை வீசட்டும் செயலில்.
பூரிப்பை அள்ளித் தரட்டும்.
புது அனுபவம் காத்திருக்கும்
புதுச் சரித்திரம் தொடங்கலாம்.
பூத்திடும் பல முயற்சிகள்
பூரணத்துவம் ஆகலாம் நிதம்.
நீவிடும் பூபாளமாய் விரியும்
நாள் எம்மை ஆள்கிறதா!
நாளை நாம் ஆள்கிறோமா!
கோள்களின் வெற்றி வினையா!
புதிய உயிர் பிறக்கும்.
புன்னகை, புளகாங்கித நாளாகும்.
புகழுடை உயிர் மறையும்
புதிராகித் துயில் துறக்கும்.
அவமானம் அள்ளி வராத
சுயமானம் காக்கும் ஒரு
வெகுமானம் நிறையும் நாளாகிக்
கவலைகள் தெரியாத நாளாகட்டும்.
அருவியென அறிவுச் சாரலான
அரும் வாசிப்பில் மூழ்கும்
ஒரு விவரத்திரட்டான
பெரும் அறிவு நாளாகட்டும்.
நுரை பொங்கி அருவருப்பூட்டி
திரையிடும் பல வினைகளிற்கு
இரையாகும் நாளாகவின்றி
இரையாகாத நன் நாளாகட்டும்.
பிரசுரிக்கப்பட்ட திகதி: 2012-07-04