உயிர்ப்பு
---------------
மூச்சு..
தந்திர முள்வேலியுள் பெறும்
இயந்திர வாழ்வு தராது
சுதந்திர வாழ்விற்கு உயிர்ப்பு.
காற்று..
விலை கொடுத்து வாங்காத
விலையில்லா ஒளடதம்
மலைப்பிரதேசத்து உயிர்ப்பு.
நறுமணம்..
இயற்கைப் பரிசாம் நல்
உயிர்ப்புடை மலர்களால்
உல்லாசச் சூழல், நல்
உணர்வின் மகிழ்வால்
உயிரும் மகிழ்வடைகிறது.
புது வலிமையடைதல்..
அருவிச்சாரலாக மனிதனை நிதம்
மருவும் குளிர் மொழிகள்
அருமை உறவிற்கு தரும்
விருப்புடை உயிர்ப்பு.
இளைப்பாறுதல், உயிர்த்தெழுதல்..
வேலையில் இடைவேளை,
வெயிலில் அருமை நிழல்,
நாளின் இரவுத் தூக்கம்
பாலைவனப் பசுஞ்சோலை மனிதனுக்கு.
தாளின் புதுப் பக்க உயிர்ப்பு.
பிரசுரிக்கப்பட்ட திகதி: 2010-01-13