நிலாவும் குற்றவாளியே!..காதல் யுத்தம்..லேட்டஸ் லவ்
01.
நிலாவும் குற்றவாளியே!
-----------------------------
இரவில் அரங்கேறும் கொடுமைகளை
அறிந்தும் நீ மௌனம் காப்பதால்
நீயும் குற்றவாளியல்லவா நிலவே?
இதை உணர்ந்து வாழ்வதாலா
நீயும் சிறைக்கைதிகளைப் போல
வெள்ளை ஆடை அணிகிறாய்
வெண்மதியே?
வெட்கத்தால் இரவில் மட்டும்
முகம் காட்டும் உனக்கு
இயற்கை அன்னை வழங்கப்போகும்
தண்டனைதான என்ன?
கைதுசெய்வர் என்ற அச்சத்தால்
நட்சத்திரப் படைகளுடன் வானில்
வலம்வரும் திங்களே உனக்கு
மனட்சாட்சி இல்லையா?
பகலில் உன்னை மறைக்கும்
பகலவன் கூட குற்றவாளிதானே?
02.
காதல் யுத்தம்
------------------
காதல் தேசத்து இளவரசியே...
என் இதயக் கோட்டையை
கைப்பற்ற படையெடுக்கின்றேன்
காதல் போருக்கு தயாராகிவிடு!
'அன்பு', 'நேர்மை' என்ற
ஆயுதங்களைக்கொண்டே
உன்னுடன் யுத்தம்
செய்யப்போகிறேன்
முடிந்தால் திருப்பித் தாக்கு!!
'முத்தம்' என்ற குண்டுகளை
நீ அங்கும் இங்கும் அள்ளிவீச
காதல் போராளியான நான்
இன்பத்தில் மரணிக்கிறேன்
இளவரசியே...
சமராட வேண்டாம் உடன்
சரணடைந்துவிடு கண்ணே!
இனியும் போர் நீடித்தால்
காதல் சட்டத்தை நான்
மீறிவிடுவேன்!
03.
லேட்டஸ் லவ்
---------------------
உன் இதயத்துக்குள்
நுழைவதற்காக காதல்
பாதையைக் காட்ட
'கூகுள்' கூட மறுக்கிறதே
பெண்ணே!
உனக்காக 'ஸ்கைப்'பில்
நித்தமும் காத்திருப்பதால்
என் வாழ்க்கையே காதல்
கடிகாரமாகிவிட்டதடி!!
பகிரும் அனைத்தையும்
'பேஸ்புக்'கில் 'லைக்'
பண்ணும் உனக்கு என்னை
மட்டும் ஏன் பிடிக்கவில்லை?
அன்பே! நீ என்னை மறந்தாலும்
என் இதயத்தின் 'பாஸ்வேட்'
நீதானடி! அது இல்லையேல் - என்
இதயம் இல்லையென்றாகி விடும்...
பிரசுரிக்கப்பட்ட திகதி: 2013-05-24