இன்னும் கலையாமல் கொஞ்சம்
- வேதா மஹாலஷ்மி
படிகளில் பார்க்காமல்
பார்த்ததில் கொஞ்சம்,
உன் பரவசத்தை
பார்த்தும், பார்க்காததில் கொஞ்சம்...
மனசோடு மனசாகப்
பேசியதில் கொஞ்சம்,
மவுனமாய் மருகியே
பேசாததில் கொஞ்சம்...
இளம் மாலையில் இன்பத்தில்
இணையாய் நடந்ததில் கொஞ்சம்,
துளிர் காலையில் துன்பத்தில்
துணையாய் கிடந்ததில் கொஞ்சம்..
கலைய வைத்து நானும்
கலைந்ததில் கொஞ்சம்,
காத்திருக்கும் என் கனவுகள்
கலையாததில் கொஞ்சம்,
உன் அன்பைத் தேடி
அலைந்ததில் கொஞ்சம்
அருகாமை தேடி
அலையாததில் கொஞ்சம்,
ஊசி முனையில்
உன் உள்ளத்தில் நுழைந்ததில் கொஞ்சம்,
உயிரோடு உறைந்தும் உன் கருணை
உருகி வழியாததில் கொஞ்சம்,
புதிதாய் உன்னைக் கவிதை
புனைந்ததில் கொஞ்சம்,
புதிரான உன் புன்னகையை மட்டும்
புனையாததில் கொஞ்சம்,
மூச்சுத்திணற உன் முத்தத்தில்
நனைந்ததில் கொஞ்சம்,
உன் இளமையின் யுத்தத்தின் சத்தத்தில்
நனையாததில் கொஞ்சம்,
ஈருடல் ஓருயிராக
இணைந்ததில் கொஞ்சம்,
இன்னமும் முழுவதும்
இணையாததில் கொஞ்சம்,
கவிதைக் கள் உண்டு
மலர்ந்ததில் கொஞ்சம்,
கள் கொண்ட பூக்கள்
மலராததில் கொஞ்சம்,
அத்தனையும் உனக்காய்
அணைத்ததில் கொஞ்சம்,
தித்திக்கும் தீண்டல்கள்
இன்னும் அணையாததில் கொஞ்சம்,
இனிமையும் என் இளமையும்
தீர்ந்ததில் கொஞ்சம்,
தனிமையும் உன் தாகமும்
தீர்க்காததில் கொஞ்சம்,
உன் வசியத்தோடு
வாழ்ந்ததில் கொஞ்சம்,
வாசத்தோடு வாழாததில் கொஞ்சம்,
நினைவுகள் நெஞ்சில்
நிறைந்ததில் கொஞ்சம்
உன்னால் இன்னமும்
நான் நிறையாததில் கொஞ்சம்
பசி போக்கும் உன் பசலை
குறைந்ததில் கொஞ்சம்
பருவத்தால் என் பருவம்
குறையாததில் கொஞ்சம்
இப்படியே...
கொஞ்சலும் கெஞ்சலுமாய்
துள்ளலும் துடிக்கலுமாய்
பார்த்துப் பார்த்துக் கட்டிய கூட்டை
பட்டென்று கலைத்துவிட்ட
உன் பண்பாட்டு மொழிகளால்
பாராமுகங்களால்
உள்ளம் உடைந்ததில் கொஞ்சம்,
உடையாததில் கொஞ்சமுமாய்
எனக்கும் உனக்கும் சேர்த்து...
கொஞ்சம் கொஞ்சமாய்
இறுதிவரை,
காதலித்துக் காத்திருப்பேன்
கண்களில் கனவுகளோடு - அழகான
நம் நினைவுகளோடு!!!!
veda
piraati@hotmail.com
பிரசுரிக்கப்பட்ட திகதி: 2004-11-21