வெடிகள் வாங்க
வியத்தகு காரணங்கள்
--------------------------------------
சொந்தங்கள் மடிய
தேசநலன் கருதி
சிறைக் கம்பிகளுக்குப்
பின்னால் இருந்துப்
பற்ற வைக்க
இந்தத் தீபாவளிக்கு
புஸ்வானத்தைக் கட்டாயம்
வாங்குங்கள்
சம்சாரம் முகம் கூடத்
தெரியாமல்
மின்சாரம் படுத்தும் பாட்டில்
மத்தாப்பு கொளுத்த மறந்துவிடாதீர்கள்
விலைவாசி ஏறி
பொருளாதாரம் வீழ்ந்து
வாங்குவோர் சக்தி குறைந்து
நிற்கும் இந்தவேளையில்
சாட்டையைக் கொளுத்தி வீசுங்கள்
அதுவே சரியான தீர்வு
அணுகுண்டு செய்ய
அனுமதி நமக்கு இல்லை
எனவே நாம் வெடிக்கத்
தக்கது வெங்காய வெடியே
அதற்கு முக்கியத்துவம் கொடுங்கள்
சரவெடிகள்
மழையில் நனைந்த
மனிதச் சங்கிலிகள் போல் கலைந்தும்
கலையாமலும் மோசம் செய்யலாம்.
தனிவெடியே நல்லது.
புவி வெப்பம் அதிகமாகும்
ஒலி மாசு அதிர்ந்து விடும்
அதனால் புகையில்லா
ஊதுவத்தியே
இந்தத் தீபாவளிக்குப் போதும்
புகைந்தால் அதற்கும்
அபராதம் கட்ட நேரிடும்
துப்பாக்கிகள் தேவையில்லை
அவை இலக்(ங்)கை(யை)க்
குறிவைத்து விடலாம்.
சுத்தியல் தேவையில்லை
அது கட்சிச் சின்னம் ஆகிவிட்டது.
பொட்டுவெடிகளைப் பொசுக்க
வெறுங்கல்லே போதும்
கற்காலம் நோக்கி
நாம்
பயணிக்கிறோம்
என்பதற்கு இதுவே சாட்சி
வெடிகளை வாங்க
வியத்தகு காரணங்கள் இவை.
-மு. பழனியப்பன்
------------------------------
M.Palaniappan
manidal.blogspot.com
puduvayalpalaniappan.blogspot.com
பிரசுரிக்கப்பட்ட திகதி: 2008-11-04