கோழி இறகும் காகங்களும்
-துவாரகன்-
ஒரு நாள் மதியம்
எல்லாக் காகங்களும் கூடிக் கரைந்தன.
வீட்டின் முன்புற மாமரத்திலும்
பின் வளவு முருங்கையிலும்
வேலியோரக் கதியால்களிலும்
கூடியிருந்த காகங்கள்
பலமாகக் கரைந்தன.
தேடலில் இறங்கினேன்.
வீட்டிலேதும் மீன் வெட்டவுமில்லை.
அதன் உறவுக் காகம் இறந்த
அடையாளமும் இல்லை.
வீட்டாரைக் கேட்டேன்.
யார்க்கும் ஏதென்று தெரியாதாம்.
அப்போதுதான்,
என் வீட்டு மஞ்சள் பூப்பந்தற் காலருகே
பிடுங்கி எறியப்பட்ட
நான்கைந்து
வெள்ளை சாம்பல் கலந்த கோழி இறகுகள்.
கோழி தானாக இறகு உதிர்க்குமா?
காகங்கள் இன்னமும் கரைந்தபடி
இறகுகள் மட்டும் அடையாளமாக.
- துவாரகன்
பிரசுரிக்கப்பட்ட திகதி: 2007-12-16