கடலும், தீவுகளும்.. எனக்குள் ஓடும் நதி.. கறுப்பு நிற ஆப்பிள் கனிகள்
01.
கடலும், தீவுகளும்
----------------------------
அலைகள் இல்லாத
ஒரு கடலை உருவாக்கினேன்
ஆழ் கடலில் மட்டும்தான்
அலைகளின் ஆக்ரோஷம் இருந்தது
இந்தக் கடலைப் பற்றி
நீங்கள் தெரிந்து கொள்ளும் போது
நான்கு பக்கங்களும்
மலைகளால் சூழப்பட்ட
அழகான தீவை
நான் உருவாக்கிக் கொண்டிருப்பேன்
02.
எனக்குள் ஓடும் நதி
-------------------------------
எனக்குள்
ஒரு நதி ஓடுகின்றது
அந்த நதியை நான் விரும்புகிறேன்
என் கண்ணீர் தீர்ந்து
நதி வறறி
இறுதி இரங்கலோடு
மீன்கள் எனக்குள் துடிக்கும் போது
நான் மீண்டும் அழுவேன்
எப்போதும் வற்றாத என் நதியை
நீங்கள் என்றாலும்
கடந்து செல்லுங்கள்
அதுவரை என் அறையின் கதவுகளை
அடைத்துக் கொள்கிறேன்
நீங்கள் ஓசை எழாமல்
கால்களில் ஈரம் படாமல்
என் இதயத்தின் மீது
நடந்து செல்லலாம்
தயவு செய்து என் நதியில் ஓடும்
மீன்களை உங்கள் கண்களுக்குள்
நிரப்பிச் செல்ல முடியுமா
இந்த மீன்களின் உயிர்
என் கண்ணீரில்தான் இருக்கிறது
கண்ணீரை இந்த மீன்களுக்காக
விரும்பி ஏத்றுக் கொண்டிருக்கிறேன்
இல்லை என்றால்
எனக்குள் ஓடும் இந்த நதி
எப்போதோ வற்றியிருக்கும்
03.
கறுப்பு நிற ஆப்பிள் கனிகள்
--------------------------------------------
ஆப்பிள் கனி ஒன்றை
புசித்து கொண்டிருந்தேன்
நறுக்கிய துண்டுகள்
ஒவ்வொன்றிலும்
அவமானத்தால் கூனி குறுகி
நின்று கொண்டிருந்தார்கள்
ஆதாமும் ஏவாளும்
அவர்களது கைகளில் இருக்கும்
கறுப்பு நிற ஆப்பிள் கனிகளை
எப்படிப் புசிப்பதென்று
இருவருக்கும்
தெரிந்திருக்கவில்லை
- ஸமான்
பிரசுரிக்கப்பட்ட திகதி: 2015-11-05