பூரணம் மிளிரும்
-------------------
பூரணம் மிளிரும்
பள்ளக்கு தேவதையாய்
நதியின் மீது பவனி வரும்
பால் நிலா.
நெடும்பயணத்தின் முடிவில்
நீலம் தறிக்கும் யோகியென
சுயமிழந்து கடலினில் உப்பாய்
கரைகிறது ஜீவநதி.
யுகங்களைத் திண்றும்
நிரம்பாத ஆழ்கடல்
சிறுவர்களின் மணல் வீடுகளை இடித்து
விளையாடிக் கொண்டிருக்கிறது.
கையிடுக்குகளில் ஒழுகும் நீலக்கடலை
அள்ளிவந்து ஒவ்வொருத் துளியாய்
என் பேனாவிற்குள்
மை நிரப்புகிறேன்.
- சத்யஜீவா
பிரசுரிக்கப்பட்ட திகதி: 2012-11-29