பிச்சைக்காரி
01.
பிச்சைக்காரி
-----------------
கடந்து போகும் மனிதர்களின்
தன்னலக் கூச்சல்களில்
கரைந்து போய்க்கொண்டிருக்கிறது
அவளின் விசும்பல்கள்...
பாத்திரம் நெளிந்திருப்பதால்
தானும் நெளிந்திருப்பதாய்
காரணம் சொல்லிக்கொண்டிருந்தன
வழக்கொழிந்த காசுகள்...
பழுப்பேறி நிறம் மாறிய
தலைமுடி, பிச்சைக்காரிகளுள்
அழகானவளாய் அவளைக்
காட்டுவதற்காய் இருந்திருக்கலாம்...
இவைகூட எனக்குச் சொந்தமில்லை
என்பதாய்த்தானோ அவள்
தலைகவிழ்ந்து கிடந்திருந்தாள்?...
விசும்பல்கள் விட்டுச்சென்ற
அவளின் உப்பு நீர்த்துளிகள்
அவளுக்கு இரண்டு பிரம்படிகளைப்
பெற்றுத்தரலாம்...
02.
அவளின் பிரம்மன்
---------------------------
பிறந்த நாள்முதலாய்
பெயரறியாப் பழமொன்றைக்
கையில் பிடித்தபடி நிற்கிறாள்
முந்தானை நழுவிய
பெண்ணொருத்தி,
என் அறை சுவற்றில்...
பெயரறியா பழமோ,
நழுவிய முந்தானையோ
அள்ளிக்கொள்ளாத என் கவனங்களை
மிகக் கவனமாய் சேகரிக்கின்ற
அவளின் கண்களில்
என்னை பார்த்துச் சிரிக்கிறான்
அவளின் பிரம்மன்...
பிரசுரிக்கப்பட்ட திகதி: 2010-08-18