தசைரோபோ.. என் சீருடைப்பிறையே
01.
தசைரோபோ
--------------------
ஐயிரு பௌர்ணமிகள்
நான்விளைந்த
பையநான்
வளர சோகசுயம் மறைத்த
அமாவாசை
உதிரமதைப்
பாலாக்கி தரும்
உன்னதப்பொறி
பிஞ்சுக் கணமதிலென்
சின்ன உறுப்புகளைத்
தன் விரலால் செதிக்கிய சிற்பி
வையமிதில்
கற்கைகள் பல தொடர
கதிர் தெளித்த ஞாயிறு
சேயென்னுயர்வின்
கூனிகளை மாய்க்கச்சீறிய
சுனாமி
தன் நினைவகமதில்
தன்னலம் மட்டும் பதியமறந்த
தசைரோபோ
காப்பும் பரிவும்
பாதமதில் சுவனமுஞ் சுமந்த
சுமைதாங்கி
தன்னால் தொடமுடியாது போன
சிகரங்களுக்காய்
எனக்குள் ஏணிகள் வளர்த்த விவசாயி
தான் பறக்க நினைத்த
வானத்திற்காய்
எனக்குள் சிறகுகள்
வரைந்த தூரிகை
இல்லம் அலுவல் இரண்டிலுமேயென்
சின்னச்சின்ன் இடர்களைளயும்
இதமாய் களையும் நேர்த்திமிக்க நிர்வாகி
பரிவினாசானாயாய்
பாரினில் பவனி வரும்
அன்பின் அகராதி.ஷஷஷ
02.
என் சீருடைப்பிறையே…….!
----------------------------
சீருடைப்பிறையே!
எனதில்லத்துமுற்றத்தில்
நெல்லுமணி பொறுக்கும்
சின்னச்சிட்டுக் குருவியாய்
பள்ளிநேரமதில் நீ……
சாடிகொண்ட செடிமலர்களுக்குள்ளே நெடிய
வாயுறுப்பிறக்கி அமுதமுறிஞ்சும்
வண்ணத்துப்பூச்சியே!
கண்ணாடித்தொட்டியுள் பச்சைப்புழுவாய்
வளைந்து நெளியும்
வலிஸ்நேரியப் பற்றைக்குள்
ஒளிந்து விளையாடும் பொன்மீன்குஞ்சே!
குப்பை கிளறிக்குறுணல்
கொறிக்குமென் வெண்கோழிக்குஞ்சே!
மாடத்து மினாரங்களில்
சடசடத்துப் பறக்கும் வெள்ளிப்புறாவாய்
பள்ளி மைதானமதில் படபடத்துத்திரிபவளே!
சீரூடைப்பருவமதில் நான்
சுவாசிக்கமுடியாதுபோன
சுதந்திர வானங்களுக்கான
அத்தனைசிறகுகளையும்
மொத்தமாய்விரித்திருக்கிறேன்
உன்
இலட்சியத்தேடலுக்காய்!
புரிந்துகொண்டேன்
சிரிப்பாலானவளே!
சீருடைப்பிறையே!
பேனாபிடித்த உன்
சின்ன விரலிடுக்கின்
பெருவெளிகளுக்குள்ளே
எட்டா முடிவிலித்தூரத்தில்
விரிந்து வியாபித்துக் கிடக்கின்றன
சிகரக் கனவுகள்.
எனவேதான்
இறைஇறைஞ்சலுக்காய்
இருகரமுயர்ந்திடக்
காத்திருக்கிறேனம்மா உன்
எல்லாவிதத்தேடல்களுக்குமான
அடைவுமட்டங்களுக்காய்…….!
என்
தேர்ர்ச்சித் திட்டங்களோடும்
உன்னதமான
தாய்மையின் பரிவுகளோடும்..
பிரசுரிக்கப்பட்ட திகதி: 2009-08-09