என்ன செய்ய.. குழந்தைக் கேள்விகள்.. முகமூடிக் கவிதைகள்.. புறக்கணிப்பு
01
என்ன செய்ய..?
--------------------
இன்ன பிற விஷயங்களென்றால்
இழுத்துப் பிடிக்க வேண்டியிருக்க
பெண் காதல் காமம் என்றால்
பெருக்கெடுத்து ஓடி வரும்
இந்த கவிதை வரிகளை
என்ன செய்ய?
02
குழந்தைக் கேள்விகள்..!
----------------------------
ஏன்
வீடு திரும்ப வேண்டும்?
ஏன்
சக்கரங்கள் சுழல்கின்றன?
ஏன்
அம்மா வேலைக்கு போவதில்லை?
எங்கே போய்க்கொண்டிருக்கிறார்கள்
எல்லோரும் இத்தனை வாகனங்களில்?
வளர்ந்த பின் தான்
வேலைக்கு போகணுமா?
சாலையோர பூனைகளுக்கு
யார் சாதம் தருவா?
குழந்தைத்தனமாகவே இருப்பதில்லை
எப்போதும்
குழந்தைகளின் கேள்விகள்.
03
முகமூடிக் கவிதைகள்
---------------------------
சூழல்கள் வேண்டும் முகங்களை
சுலபமாய் தரிக்கும்
இவனைப்போல்தானே இருக்கும்
இவன் கவிதைகளும்.
04
புறக்கணிப்பு
-----------------
இவன் பற்றிய புறக்கணிப்பு
இருக்கட்டும் ஒருபுறம்.
இவர்களின் குழுச்சண்டையின்
இடையில் சிக்கித் தவிப்பது
இரண்டாயிரமாண்டு
தமிழ்க்கவிதை அல்லவா?
-செல்வராஜ் ஜெகதீசன், அபுதாபி
பிரசுரிக்கப்பட்ட திகதி: 2008-12-06