துப்பாக்கிகுழல்களுக்குள்...
-----------------------------------
துப்பாக்கிகுழல்களுக்குள்
குடியிருக்கின்றோம் நாங்கள்
இன்றுவரைக்கும்
அழுவதற்கும் சுவாசிப்பதற்கும் மட்டுமே
அனுமதிதேவைப்படவில்லை.
நாளையோ,மறுநாளோ
காற்றையும் பரிசீலித்தே
சுவாசிக்கவேண்டியிருக்கும்
இதைப்போல அது அதைப்போல இது
ஒன்றினுடாக இன்னொன்று
இன்னொன்றினூடாக வேறொன்று
அதுக்காக இது இதுக்காக அது
எதுக்காக நாமென்று ஏதுமறியா நாளின்று
காற்றினூடாக க் கடத்தல்
தீயினூடாகத்திருட்டு
அரசியலில் சமயம்
சமயத்தினூடாகச் சாதீயம்
சாதீயத்தினூடாக அரசியல்
அரசியலால் அழித்தல்
பக்தி பயமுறுத்தும் பயம் உயிர்கொல்லும்
உயிரழிவில் பேய்மகிழும்
பேய்களேகடவுளாகிவர பிரயத்தனப்படும்,
துப்பாக்கிகுழல்களுக்குள்
நாங்கள் குடியிருக்கும்வரை...
- ஈழநிதி
பிரசுரிக்கப்பட்ட திகதி: 2012-03-09