காதல் கொடை.. மார்கழி காதலி..மாதிரிகள்
01.
காதல் கொடை
---------------------
என் காதலை
உன் பாதங்களில்
சமர்ப்பிக்கிறேன்
ஏற்றுகொள்வதும்
ஏற்றுக்கொளளாததும்
உன் இதயத்தின் முடிவில்
மிஞ்சினால்
மிதியடியாக பயன்படுத்து
பிஞ்சி போனால்
உன்னை சீண்டுபவரை சாத்தும்
உன்பாதத்துடன் பழகி பழகி
பரதன் மதிக்கும்
இராமனின் பாதஅணிகளாக மாறி
உன் மனது ஆளும் நேரம்
மழை வரும்
சிரமேற்கொண்டால்
என் காதல் (கொ) குடையாகும்
02.
மார்கழி காதலி
-----------------------
மார்கழி பனி நீ வெளியே வரும்வரை
உன் வீட்டு வாசலில் காத்திருந்து
உன்னை தொட்டு குளிர் காய்ந்து கொள்ளும்
வெட்டைஇல்லாமல் வாசல் தெளித்தை கண்டு
மார்கழி பனி வெட்கி தலை கவிழும்
நீ உன்வீட்டு வாசலில் போடும் மாக்கோலத்தை கண்டு
கதிரவன் கிழக்கு வாசலில் போட்ட கோலங்களை
கலைத்து விடுவான்
நீ உன் வாசலில் இட்ட கோலம்
பூமாதேவிக்கு வைக்கப்பட்ட திலகமாகும்
நீ வைக்கும் செம்பருத்தி பூவுக்காக
சாணி பிள்ளையார் கோலத்தின் நடுவில்
அழகாக அமர்ந்து அருள் வழங்கிறார்
நேற்று வைத்த சாணி பிள்ளையார்
தட்டப்பட்டு காய்கிறார் வெயிலில்
அவரை ஆற்றில் விடும் காணும் பொங்கலை
எதிர்நோக்கி பொருநை ஆறும்
உன் பாதம் தொட காத்திருக்கிறது
03.
மாதிரிகள்
----------------
அண்ணன் மாதிரி என்றும்
தங்கை மாதிரி என்றும்
அபத்த மாதிரிகள்
வேறு மாதிரிகளாக மாறுவதுண்டு
மாமனார் அப்பா மாதிரி
மாமியார் அம்மா மாதிரி
மருமகன் மகன் மாதிரி
மருமகள் மகள் மாதிரி
ஒரு போதும் மாதிரிகள் அசலாவதில்லை
மாய மான் என தெரிந்தும்
சீதைகளுக்காக ராமர்கள்
அன்பு அற த்தை தூக்கி போட்டுவிட்டு
துரத்தும் நாடகம் நடந்து கொண்டே இருக்கிறது
கங்குகள் மீது படிந்த சாம்பலை
கைகள் அறியும்
அலுத்துவிட்ட காட்சிகள் என்றாலும்
அலுக்காமல் அரங்கேறுகின்றன
உண்மை முகம் காட்டும் போது
உறவு பனிகள் உதிர்ந்து விடுகின்றன
பிரசுரிக்கப்பட்ட திகதி: 2012-01-24