மனமுதிர் பருவம்
--------------------------
காற்றுடன் பொருதும் வேகம்
காகிதம் போல் மனமாகும்
வேற்றுமை விளங்கா மோகம்
வேறென்ன, வளர்சிதை மாற்றம்.
காட்டாறு போலும் பிரவாகம்
கவலையெலாம் மூழ்கிப்போகும்
வீட்டாரும் வியக்க நடையாகும்
விளைவறியா வாலிப விவசாயம்
கேட்பதெல்லாம் காதில் மோதும்
காதல் ஒன்றே இதயம் சேரும்
நாட்பகலாய் நாகரீகம் நாடும்
நல்லவையோ நகைப்புக்காகும்.
எதிர்பால் ஈர்ப்பு இருக்கும்
ஏதேதோ கவிதை சுரக்கும்
எதிர்மறை எண்ணம் வாய்க்கும்
இராக்கனவு வெட்கம் பூக்கும்.
அழகின் அழகாய் தன்னைப் பார்க்கும்
ஆயிரமாயிரம் நேரம் போக்கும்
வழமைஅழகை வெளியில் தேடும்
உள்ள அழகை உணராப் பருவம்.
போற்றிடும் இலக்கை நோக்கும்
பொறுமையால் வெற்றி சேர்க்கும்
ஆற்றலுயர் இளையர் கூட்டம்
அவனியிலே ஒளியைக் கூட்டும்.
- இப்னு ஹம்துன்
(ஜுன் 20, 2006ல் எழுதியது)
பிரசுரிக்கப்பட்ட திகதி: 2009-01-22