வாக்குமூலம்.. இன்று வேறு நாள்!
01.
வாக்குமூலம்
----------------
'நான்' என்பது உலகமாயிருந்தது!
பால் எது? சுண்ணாம்பு எது?
விளங்காத போது
'நான்' என்பது உலகமாயிருந்தது.
சூழ்ந்து கடிக்க வந்தன
சுயநலங்கள்.
ஒதுங்கி ஒடுங்கியதில்
'நான்' என்பது தானாய் ச்சிறுத்தது.
இப்போதும்
இருட்டும் போதெல்லாம்
வழிகளின் பயத்திலோ
வலிகளின் உணர்விலோ
உறவை, நட்பை உள் வாங்கி
'நான்' சற்றே விரிவதுண்டு.
சமூக வீதிகளில்
யுத்த காலங்களின்
பரஸ்பர தாக்குதல்களில்
இனத்தை மதத்தை
இழுத்தணைத்து க் கொள்ளும் 'நான்'.
அதீத எதிர்பார்ப்புகளின் போதும்
அநாதரவான தருணங்களிலும்
இறை ஆதரவை நாடி ஓடி
இணைந்துக்கொள்ளும் 'நான்'.
ஆதாயங்களின் போதும்
கவனிப்பாரற்று தனிமை காணும் போதும்
தன் கூடடங்கும் 'நான்'.
அளவீடுகளுக்கு அடங்காமல்
மாறிக் கொண்டேயிருக்கும் 'நான்'
மண்ணில் அடங்கிப் பின் தீரும்.
02.
இன்று வேறு நாள்!
------------------------
நேற்றைப்போலில்லை!
கணப்பொழுதில் நீண்டுவிட்டது
வெயிலின் கொடு நாவு
வெளியெங்கும்
பரவியிருக்கும் வெறுமை
முகத்திலறையும் பூதம்!
இரத்தம் வெளிறி
உறைந்துக் கிடக்கின்றன
இரவு பகல்கள்
பொருள் பிரிக்க..
சக்தி இழக்கிறது வாழ்க்கை!
காலடித்தடங்களில்
ஞாபகத்துணுக்குகள்
சிந்தியபடி மனம்.
நீ ஊருக்குப் போயிருக்கிறாய்!
-இப்னு ஹம்துன்
http://ezuthovian.blogspot.com/2005/02/blog-post_23.html
------------------------------
H.FAKHRUDEEN
பஃக்ருத்தீன் (இப்னு ஹம்துன்)
+966 050 7891953
www.ezuthovian.blogspot.com
பிரசுரிக்கப்பட்ட திகதி: 2008-05-11